Dienas ziņas 03.10.2026

ASV piļņeibā izvad armeji nu Iraka

ASV karaspāks piļņeibā izvasts nu Iraka. Par tū paziņuo Iraka vaļdeibys omotpersona. Pec Pentagona datim pādejūs godūs Irakā atsaroda ap 2500 ASV karaveiru. Trešdiņ, kod oficilai beidzās ASV karaspāka izvešonys termiņš, Irakā suocēs četrys oficialys vaļsts svātku dīnys. Šū nūtykumu atzeimoj kai "Naatkareibys dīnu", Iraka vaļsts īstuodes ir slāgtys.

ASV iz Tyvejīm Austrumim nūsyutēja vēļ vīnu aviacejis bazys kugi

ASV prezidents Donalds Tramps pīļaun īspēju atsuokt ploša mārūga militarus uzbrukumus Iranai pec 3. novembrī gaidamuom Kongresa vydustermiņa vēlēšonom. ASV nūsyutēja iz Tyvīm Austrumim vēļ vīnu aviacejis bazys kugi. Iz "USS Theodore Roosevelt" i jū pavadūšīm kugim atsarūn vairuok par 7000 jyurnīku i 2000 jyurys kuojinīku. Tikmer Teheranā teik gatavuota plošuoka i spēceiguoka atbiļde gadejumam, ja ASV nūļems uzbrukt Iranys teritorejai.

Pasauļī aug puortykas cenys

ANO Puortykas i lauksaimnīceibys organizaceja informej, ka puortykas produktu cenys pasauļī sentebrī beja sasnāgušs jaunu augstuokū leimeni kūpš 2022. goda novembra. Cenu indekss paguojušajā mēnesī pasacēļe par 1,5 % leidz 136 punktim. Tys beja kuopums jau trešū mēnesi pec kuortys. Cukra cenom registrēts leluokais pīaugums – par 6,1 %. Labeibai cenys kuopušs par 5,1 %, gaļai cena nadaudz krytuse - par 1,1 %.

Krīveja vairuok naudys planavoj armejai

Krīveja nuokušgod planavoj militarīm izdavumim 17,1 triljonu rubļu. Izsokūt Eiropys valutā tys sastuodeitu 178 miljardus eiro. Kai līcynoj dokumenti, kurūs izpētēja ziņu agentura "Reuters", tod nūsauktuo summa ir apmāram par 27% leluoka kai suokūtneji budžetā paradzātuo summa. Faktiskuo summa, prūtams, ir slāpta, daļa militarūs izdavumu var byut īkļauta cytuos budžeta sadaļuos. Krīvejā runoj par planym 2027. godā paaugstynuot nūdūkļus.

Ukrainys vaļdeiba spīsta struoduot taupeibys režimā

Ukrainys vaļdeiba vaļsts budžeta leidzekļu tryukuma dēļ puorīt iz maksimalu taupeibys režimu. Par tū šūnedeļa paziņuo Ukrainys premjerministrs Serhijs Koreckis. Pec juo saceituo vaļdeiba pagaidom naspēj atrast 27 miljardus dolaru karadarbeibys turpynuošonai 2027. godā. "Reuters" roksta, ka šūgod Ukrainys problemys ar uorvalstu paleidzeibys i finanšu atbolsta sajimšonu rodušuos, par tū ka vaļstī kavejās reformys, nūtyka korupcejis skandaly i streidi storp parlamentu i vaļdeibu par napopularim lykumim.

Eiropā – plošys policejis operacejis

Eiropys Prokuratura izmeklej lītu par lītuotu mobilūs telefonu puordūšonu, uzdūdūt tūs par jaunim. 19 Eiropys vaļstīs nūtyka operaceja, ar vairuok kai 160 krateišonom. Nozīdzeiga organizaceja teik turāta aizdūmuos, ka puordavuse vaira kai miljonu šaidu mobilūs īreiču. Nozīdzeiguo shema patārātuojim nūdarējuse zaudējumus vysmoz iz 300 miljonym eiro. Austrejā, Spanejā i Vuocejā aizturāti septeny aizdūmuos turamī, storp jīm - diveji organizacejis vadeituoji.

Uorkuortys situaceja pec leitim i plyudim

Latvejis vaļdeiba leidz 2027. goda 10. janvaram izsludynuo uorkuortejū situaceji vysā vaļsts teritorejī saisteibā ar šuo goda leitu i plyudu sekom. Ministru kabinets šūnedeļ apstyprynuo attīceigu reikuojumu. Zemkūpeibys ministreja nūlykta par atbiļdeigū instituceji darbeibu koordinacejai. Ministru prezidents aizdeve ZM pīpraseit nu Eiropys Komisejis realu atbolstu vītejīm zemnīkim.

Apkures dēļ cylvāki mazynuos ikdīnys tēreņus

Latvejā šūgod pīaug īdzeivuotuoju skaits, kurī apkures izmoksu dēļ paradz mazynuot ikdīnys tēreņus. Banka "Citadele" aptaujā nūskaidruo, ka 22% īdzeivuotuoju paradz, ka apkuris dēļ samazynuos cytus kasdīnys izdavumus. 5% prognozej gryuteibys ar rēķinu moksuošonu.

SIA “Daugavpils dzīvokļu un komunālās saimniecības uzņēmums” – jauns vaļdis lūceklis

Par SIA “Daugavpils dzīvokļu un komunālās saimniecības uzņēmums” valdis lūcekli šūnedeļ īcalts Aleksandrs Kramorenko. Jam ir ilgu godu dorba pīredze uzjāmumu vadeibā, klientu apkolpuošonys i kontrolis jūmā, kai ari projektu administreišonā.

Jaunuo forštata kolnā lobīkuortuota teritoreja

Jaunuo forštata kolnā Daugovpiļī, kū cyti sauc par Ļūbesteibys kolnu, pabeigti teritorejis lobīkuortuošonys dorbi. Komunaluos saimnīceibys puorvaļde pastatēja divejus atpyutys sūlus ar šyupeļom, treis sūleņus i divejis atkrytumu urnys. Kūpejuos dorbu izmoksys - 9915 eiro.

Tyvojās “Daugavpils ir Talants”

Dasasaceišona jaunīšu talantu konkursam “Daugavpils ir Talants” pagarynuota leidz 9. oktobram. Daugovpiļs piļsātys Izgleiteibys, jaunuotnes i sporta puorvaļde konkursā aicynoj jimt daļeibu Daugovpiļī deklareitus jaunīšus nu 13 leidz 30 godim. 21. oktobrī byus pusfinals jaunīšu iniciativu centrā “Navigators”, finals planavuots Daugovpiļs teatrī 9. decembrī.